İkinci qız övladını dünyaya gətirəndən sonra yaradıcılığına uzun fasilə verən müğənni Rəqsanə artıq sükutu pozmağa hazırlaşır. Müğənninin bildirdiyinə görə, o, yeni ampluada çıxış edəcək: "Artıq Rəqsanə adının hansısa ucuz qalmaqallarda hallandırılmasına icazə verməyəcəyəm. Bu mənim sənət devizimdir. Yalnız yaradıcılığa köklənəcəyəm və kimsə mənimlə qalmaqal yaratmaq istədiyi halda, ona əvvəlki Rəqsanə olmadığımı başa salacağam".
Yaradıcılıq strategiyasını artıq müəyyənləşdirən müğənni ciddi plan üzərində çalışdığından danışdı. Bildirdi ki, hazırda bir sıra retro mahnılar hazırlayır. Bunların bir qismi lentə yazılıb. Digərləri isə hazırlıq prosesindədir. Müğənni ilə söhbətdən bəlli oldu ki, o, müğənni Ağadadaş Ağayevin repertuarından olan bir mahnını ifa edib. Bundan öncə isə o, həmkarının razılığını almağı unutmayıb. O bu və digər mahnıların yaradıcılıq həyatında mühüm rol oynayacağını əminliklə söylədi: "Bir müddət əvvəl Azərbaycanın xalq artisti Zeynəb Xanlarovanın repertuarından silsilə mahnılar oxuyacağım barədə xəbər vermişdim. Sənətkarla görüşümüzdən sonra onunla münasibətlər gözlədiyimdən də yaxın oldu. Zeynəb xanım bildirdi ki, arxivində hələ heç yanda səsləndirilməyən öz bəstələri durur. O, həmin mahnıları mənim ifamda eşitmək istədiyini bildirdi və söz verdi ki, onlardan bir neçəsini mənə təqdim edəcək. İnanıram ki, yeni repertuarımın hazırlığından sonra sənət aləminə yeni imza atmış olacağam".