Müğənni hesab edir ki, mahnılar qonşu ölkəyə "Səbuhi" studiyasının xətti ilə göndərilir
Ötən həftədən etibarən Röyanın "Bax" adlı növbəti albomu Bakı dükanlarında satışa çıxarılıb. Müğənninin sözlərinə görə, sözügedən albom ona 37 min manata başa gəlib. Lakin müğənni həmin məbləği albom satışından çıxara biləcəyinə əmin deyil. Çünki piratların səbirsizliklə satışını gözlədikləri disk saxta yolla tirajlanaraq onlara yüksək məbləğ qazandıracaq. Lakin Röyanın yaşadığı bu problem təkcə Azərbaycanda deyil, Türkiyəyə də gedib çıxır. Müğənninin bildirdiyinə görə, o artıq bunun həlli yollarını tapıb. Qonşu ölkədə özünə vəkil tutan müğənni məsələnin hüquqi yolla həllinə çalışır: "Əslində, bunu birbaşa məhkəmə yolu ilə həll etmək istəyirdim. Lakin Türkiyədə bir neçə məhkəməyə müraciət etdim və tələb olunan sənədlər bizdə əksini tapmadığı üçün işin uzanacağını düşündüm. Artıq məsələ ilə vəkilim məşğul olur".
Röyanın açıqlamasına görə, onun diskləri Türkiyəyə "Səbuhi" studiyasının xətti ilə gedib. Bunun qarşısını almaq üçün vəkili ilə birlikdə çalışan müğənni eyni kampaniyanı "Bax" albomunun satışı zamanı həyata keçirəcəyini bildirdi: "Türkiyədə hər bir müğənni albom satışından 70 faiz gəlir götürür. Mən isə zəhmətimin yüksək faizini piratlara qazandırıram. Bunun qarşısını tezliklə almaq üçün bütün imkanlarımı səfərbər etmişəm"
