«Bu qadın hər kəsi öz səsiylə valeh edib», «Düşünürəm ki, hal-hazırda bu  qadın kompakt disk istehsalı ilə məşğul olan hansısa kompaniyanın rəhbəridi və butikləri var»… Əfsanəvi Azərbaycan müğənnisi, SSRİ xalq artisti Zeynəb Xanlarova barədə avropalılar belə düşünür. Avropalılar Zeynəb xanımın səsini eşitməsələr də rəsmini görər-görməz ilk təsüratları belə olub.
İstedadlı Azərbaycan rəssamı Orxan Hüseynov qərara gəlib ki, avropalıların Zeynəb Xanlarova, İlhamə Quliyeva, Səttar Bəhlulzadə, Rəşid Behbudov, Mirzə Ələkbər Sabir, Səməd Vurğun, Namiq Qaraçuxurlu, tar və Azərbaycanı təmsil edə biləcək daha nələrləsə bağlı nə düşündüklərini öyrənsin.
«Berlində və digər şəhərlərdə Azərbaycanın məşhurlarını, memarlıq əsərlərini əks etdirən rəsmlər payladım ki, avropalılar qeydlərini yazsınlar», - Orxan Hüseynov deyir.
Hüseynovun sözlərinə görə, Azərbaycan mədəniyyətini tez-tez Mərkəzi Asiya mədəniyyəti ilə səhv salırdılar. Rəssamı heyrətə gətirən isə avropalıların Hökumət Evini həbsxanaya bənzətmələri oldu. Gülməli bənzətmələr az olmayıb. Bəziləri musiqi alətimiz olan tarı elktrik paylayıcısına (razetka) bənzətdiyi halda, elələri də  tapılıb ki, onu hansısa qədim bir silah hesab ediblər.
«Bir cənub şəhərində» filmindən olan kadrı isə demək olar dəqiqliyi ilə tapıblar. «Bu, Siciliyadı, küçədə isə mafiozlar növbəti qurbanın axtarışına çıxıblar», - deyə avropalılardan biri şərh yazıb.
Stulda oturmaqla poza verən Namiq Qaraçuxurlu bəzilərinin gözünə hamını heyran etməyə can atan model kimi görünüb. Rəşid Behbudovu isə ümumiyyətlə Bollivud ulduzu çıxardıblar.
Səməd Vurğunu çox orijinal ifadə ediblər - «Stalin». Mirzə Ələkbər Sabir isə sadə avropalılar üçün nəinki terrorla mübarizə təşkilatının yaradıcısı, hətta Drakulanın qohumudur!
Yeri gəlmişkən, hollandiyalılar Novruz bayramının rəmzi olan səmənini görən kimi onu «ot» zənn edib çəkmək qərarına gəliblər.
Ən maraqlı bənzətmələrdən biri isə avropalıların İlhamə Quliyeva haqqında təəssüratlarıdır: «Yəqin ki, əvvəllər kişi olub, indi isə məşhur televiziya aparıcısıdır»…