Müğənni Brilyant Dadaşovanın «Sahil» metrostansiyasının yaxınlığında, Z.Əliyeva küçəsində yerləşən evi tamamilə yarasız hala düşüb. Evi su basması nəticəsində müğənniyə 100 min dollara qədər ziyan dəyib. Evin bütün elektrik xətləri, parketi sıradan çıxıb, çılçıraqlar parçalanıb, yemək, yataq və qarderop otağı su altında qalıb.
B.Dadaşovanın mətbuat katibi Aynurə Əhmədovanın verdiyi məlumata görə, bu binanın 75 illik tarixi var. Həmin binada yerləşən mənzilin yenidən tam təmirə ehtiyacı var. İlkin hesablamalara görə, 100 min dollara başa gələcək təmir işləri xeyli vaxt aparacaq. Ona görə də, müğənni və ailəsi bağ evində qalmağa məcbur olacaq.

Hazırda B.Dadaşovanın vəziyyətinin pis olduğunu deyən mətbuat katibi söyləyib ki, müğənninin bütün əşyaları və səhnə geyimləri bu evdə saxlanıldığından o, indi nə edəcəyini bilmir: “Bütün geyimlər, ayaqqabılar və aksesuarlar qarderob otağında olduğundan, tamamilə islanıb. Geyimlərin arasında əl işləri ilə hazırlananlar da var, onların qurudulub əvvəlki vəziyyətə gətirilməsi isə artıq qeyri-mümkündür. Ona görə də geyimlərin bir qismi artıq tamamilə istifadəyə yararsızdır”.

Qeyd edək ki, hadisənin baş verməsinə üst mərtəbədə yaşayan qonşunun evindən su sızması səbəb olub. Tam 24 saat açıq qalan su xətti müğənninin evini tamamilə su altında qoyub. Həmin vaxt müğənni və ailəsi bağ evində dincəldiyindən hadisədən gec xəbər tutulub.