|
“Opera müğənnisi Ülvi Qılınc bir neçə gün əvvəl evimə zəng edib mənimlə çox sərt danışdı. O, məni Elgiz adlı jurnalistə qurd yağı verib İlhamə Quliyevanın evinə göndərməkdə ittiham etdi. Qurd yağı nədir, adam göndərmək nədir, bircə bu qalmışdı ki, İlhamə Quliyeva məni həyatına sui-qəsddə günahlandırsın”. Bunu xalq artisti Flora Kərimova bu gün keçirdiyi mətbuat konfransında deyib. O, Ülvi Qılıncın 8 ay əvvəl də ona zəng etdiyini bildirib: “Ülvi dedi ki, 5 min dollar xərc çəkib klip çəkdirmişəm, İlhamə xanım deyir, Floranı efirdə söyməsən, klipinin yayımlanmasına imkan verməyəcəyəm. Mən də dedim, ay bala, məni söyməməklə ziyana düşürsənsə, çıx söy. Bir deyil, iki deyil, İlhamənin sözü ilə məni televiziyaya, radioya buraxmırlar, İlhamə deyir mən eləmişəm, bir kəlməmlə Floranı süpürüb atdılar. Adama nə qədər hədə-qorxu gələrlər, mən heç, bu cavanlara görə narahatam. Teymur Əmrahı döymədilər?”
Mətbuat konfransında iştirak edən Sərxan Kərəmoğlu da İlhamə Quliyevanın onu telefonda biabır etdiyini deyib: “Adama xalq artisti, prezident təqaüdü ona görə vermirlər ki, insanlara hədə-qorxu gəlsin, idmançı tutdursun ki, get filankəsi döy! O özünü kim sayır, indi biz hamımız ondan qorxub-çəkinməliyik?!”
F. Kərimova bütün söhbətlərə son verməyə hazır olduğunu bildirib: “Məni həmişə qınayırlar ki, niyə ona baş qoşuram. Mən dinmirəm. Hər yanda deyir, filoloqdur. İlhamə Quliyeva nailiyyət qazana bilmədiyinə görə 1968-ci il 13 fevral tarixli sərəncamla Azərbaycan Dövlət Universitetinin filologiya fakültəsinin rus dili bölməsindən xaric olunub, amma məni savadsızlıqda qınayır. Razıyam, bir mətbuat konfransı da keçirilsin, ikimiz oturaq, hamısını o danışsın, axırda da bu məsələyə son qoyaq. Ta bəsdir, nə qədər olar? Mən hətta onunla duet oxumağa da hazıram. Ancaq bu təklifi İlhaməyə çatdıranda mənim ünvanıma nalayiq ifadələr işlətdi”.
İlhamə Quliyevanın mətbuat katibi Faiq Ələkbərli APA-ya İ. Quliyevanın hazırda Azərbaycanda olmadığını, məsələ ilə bağlı mətbuata əlavə açıqlama veriləcəyini bildirib.
|
