Xatirə İslam artıq haqqında gəzən dedi-qodulardan yorulub. Müğənni ona ünvanlanan atmacalara cavab verməmək qərarına gəlib: «Bu gün adım mənasız və boş söz-söhbətlərdə çəkilsə də, buna əhəmiyyət verməyəcəm. Çünki o qədər problemim var ki, belə cılız dedi-qodulara qulaq asmağa nə həvəsim, nə də vaxtım var. Haqqımda kim nə deyir, qoy desin, eybi yox. Onsuz da hər kəs bilir ki, Xatirə kimdir».
Bir çoxlarının onu gözü götürmədiklərini dilə gətirən Xatirə ətrafındakı insanlara hər zaman yaxşılıq etdiyini dedi: «Öz tikəmi hamı ilə bölüşürəm. Sadəcə, bəzi insanlar başa düşməlidirlər ki, mənim qəlbimə dəymək olmaz. Çünki gec-tez Allah onların cəzasını verəcək». Keçmiş sevgilisi ilə bağlı danışan müğənni, artıq onu unutduğunu dedi: «İnsana ən yaxın olan onun sevgilisi və yaxın dostudur. Mən də bunlardan böyük xəyanət görmüşəm. Hər iki tərəfdən vurulan zərbə məni əməlli-başlı sarsıtdı. O, mənim ilk məhəbbətim idi və onu doğrudan da sevirdim. Onda heç tanınmırdım və məni efirə çıxmağa qoymurdu. Amma nə olsun, iki ilimi boş yerə ona sərf elədim. Halbuki o vaxt ərzində mən çox işlər görərdim. Digər tərəfdən isə bəli, sənətimə görə münasibətlərimizi ciddiləşdirə bilmədik».