Səmada “Allah” sözünə oxşayan ərəbcə yazı peyda olub
Tacikistan paytaxtının sakinləri iyulun 23-də gecə saatlarında ərəb dilində "Allah" sözünə oxşayan yazı görüblər. Yerli vaxtla axşam 8 radələrində səmada peyda olan yazı təxminən yarım saat aydın sezilib. Şahidlərin dediklərinə görə, yazının hərfləri əvvəlcə çox aydın olmayıb, amma sonra daha dəqiq olub. Düşənbəlilər bu möcüzəni mobil telefonların kameraları ilə çəkiblər. Metereoloqların dediklərinə görə, bu olay yağışqabağı buludlarda yığılan statik elektrik cərəyanı ilə bağlı "üfüqdə parıltı" fenomenidir. Tacikistan İslam İntibah Partiyasının sədri Mühiddin Kəbiri isə hadisənin həm insan əlinin işi, həm də Allah möcüzəsi ola biləcəyini söyləyib. "Dangara rayonundan Düşənbəyə gələndə yolda səmaya baxanda o yazını gördüm. Mavi-boz rəngdə bir yazı idi. Bunu Allahın bizə yolladığı bir ismarıc sayıram", - M.Kəbiri söyləyib.
|