O, Milli Televiziya və Radio Şurasının sədrini «mikrob» adlandırdı
Ötən gün Milli Televiziya və Radio Şurasının sədri Nuşirəvan Məhərrəmli əməkdar artist Aygün Kazımovanın efir mədəniyyəti və geyimləri ilə bağlı açıqlama verib. O bildirib ki, Aygün Kazımovanın efirdə geyimi və davranışı ilə bağlı Prezident Aparatına şikayət olunub: «Vətəndaşlardan belə şikayətlər var və biz o məsələyə baxacağıq. Bu məsələ ilə bağlı kanalların rəhbərliyinə bildirəcəyik ki, kimliyindən asılı olmayaraq, hər bir aparıcı efirdə ədəb qaydalarına riayət etməli, ədəb qaydalarından kənara çıxanlar efirə buraxılmamalıdırlar». Dünən «Xeyir ola» müəllif proqramı ilə efirə çıxan Aygün Kazımova, şura sədrinin sözlərini əməlli-başlı qulaqardına vurdu. Paltarının ətəyini bir az da gödəldən müğənni, verilişə başlar-başlamaz N.Məhərrəmlinin ünvanına atmaca atmağa başladı. Ad çəkməsə də, şura sədrinin kölgəsini qılınclayan A.Kazımova, onu «mikrob», «bakteriya» adlandırdı. Bu gedişlə başa düşdük ki, Aygün Kazımova hətta «yuxarılar»a da meydan oxuyur…
|